Fynbosfeetjies

Antjie Krog

 
Date Published :
April 2018
Publisher :
Penguin Random House South Africa
Contributor(s) :
Fiona Moodie
Illustration :
32 pages
No associated books available.

Overview
-

Dit is omrede sy fynbos – die smalblaar-, struikagtige plantegroei van die streek – dat die suidwestelike en suid-Kaap benoem is as een van die wêreld se ses planteryke: die Kaapse Blommeryk. Met ’n opervlakte van minder as 90 000 vierkante kilometer is dit die kleinste planteryk ter wêreld. Tog is dit die tuiste van 8 600 plantspesies, waarvan 5 000 nêrens elders voorkom nie. Fynbos is ’n vermenging van vier plantsoorte: protea-struike, heideagtige erikas, rietagtige restio’s en ’n verskeidenheid bolplante. In die Kaapse Blommeryk groei 69 van die wêreld se 112 proteas, 526 van sy 740 erikas en onder sy bolplante word 96 van die wêreld se 160 gladiolusspesies aangetref. Op sy eie spog Tafeberg met byna 1 500 fynbosspesies. Met Fynbosfeetjies bring Antjie Krog en Fiona Moodie, wat albei gereeld op die hange van Tafelberg gaan stap, hulde aan een van die natuurwonders van die wêreld. Antjie, geïnspireer deur Cicely Mary Barker se A World of Flower Fairies, het die bal aan die rol gesit deur verse te skryf oor verskillende blomplante wat deur minstens een denkbeeldige wesentjie bewoon word. Fiona het elke plant, insek en gediertetjie wat in hierdie boek afgebeeld is, nagevors. Die feetjies en ander droomwesentjies is haar eie skepings, maar die blomme, gogas en diertjies het sy by die natuur afgekyk en noukeurig nageteken.

About The Author
-

Antjie Krog, een van Suid-Afrika se toonaangewendste digters, het haar digdebuut gemaak terwyl sy nog op skool was. Sedertdien het sy elf bundels gepuliseer, waaronder twee met kinderverse: Mankepank en ander monsters en Voëls van anderste vere. Sy is die skrywer van die beroemde Country of My Skull , asook A Change of Tongue, wat in Afrikaans as ’n Ander tongval verskyn het, en Begging to Be Black. Sy het ook ’n novele, ’n drama en drie digbundels in Engels gepuliseer. Van haar werk is in Engels, Arabies, Frans, Italiaans, Nederlands, Serbies, Spaans, Sweeds en Duits vertaal. Naas die vier eredoktorate waarmee sy vereer is, is sy onder meer met die Eugène Marais-prys, die Raport-prys, die Hertzog-prys, die rau-prys, die Elisabeth Eybers-prys, die atkv-prys en ’n toekenning vir voortreflike vertaling van die Suid-Afrikaanse Vertalers­instituut bekroon. Sy en haar man, John Samuel, woon in Kaapstad waar sy buitengewone professor aan die Universiteit van Wes-Kaapland is.

Fiona Moodie het wyd gereis en in verskillende Europese lande gewoon vóór sy en haar man en tweelingdogters in 1992 teruggekeer en hulle in Kaapstad gevestig het. Fynbosfeetjies is een van vyftien kinderboeke wat sy geïllustreer het sedert Bohem Press in Zürich haar eerste prenteboek, Benjamin Rocking Horse, in 1979 uitgegee het. Behalwe vir ses, het sy die teks vir al haar boeke geskryf. Haar prenteboeke het in talle lande verskyn, onder meer in China, Denemarke, die Faroe-eilande, Frankryk, Neder­land, Italië, Japan, Noorweë, Suid-Korea, Spanje, die Verenigde Koninkryk en die Verenigde State, en natuurlik ook hier – en in baie tale. In 1996 is Nabulela, haar agste boek, in sewe Suid-Afrikaanse tale gepubliseer. Fiona se illustrasies is in belangrike uitstalruimtes vertoon: Galerie maag – Zürich; Internationale Jugenbibliothek – München; Metropolitan Museum of Modern Art – New York; Museo Nacional de Artes Decorativos – Madrid; Habashi Kunsmuseum – Tokio; Centro Culturale di Esposizione – Venisië; Bibliothèque Méjanes – Aix-en-Provence; en Centre Georges Pompidou – Parys. In 2000 is sy met die sappi-prys bekroon vir Atlantis Rises en in 2010 met die mer-prys vir beste prenteboek. In 2015 huldig Media24 en unicef haar met nog twee pryse.

More from this publisher